★Կարճ ականջներով թրքախօս հայ մը,
★«Ջէք» գրող մը, որ դրամատունը դրամ ունի,
★Փոքր բերնով դիւանագէտ մը,
★Պոլսահայ մը որ միլիոնատէր չէ եղած…
★Պարել չգիտցող իրանահայ մը,
★Գլուխը քերելու ժամանակ ունեցող բժիշկ մը
★Շաբաթը չորս օր լուբիա չ՚ ուտող մեքսիքացի մը
★Թրքերէն խօսող մը որ չի հայհոյեր…
★Ռուսահայ մը, որ մեծ գործարանի մը տէր եղած չ՚ ըլլայ, եւ ռուսները զինք իր «ֆապրիքայ»-ին մէջ գործաւոր ըրած չ՚ ըլլան,
★Լիբանանահայ մը, որուն 5-6 շէնքերը պատերազմին փլած չ՚ ըլլան…
★Ամերիկացի մը, որ օրական երեք տեսակէն պակաս դեղահատ կը կլլէ,
★Հայկական ժողով մը, որու ընթացքին դրամական հարցի վրայ չխօսուի,
★Դրամական հարց մը, որուն վրայ ժողով չգումարուի,
★«Շիրակ» երգարանին մէջ անսխալ երգ մը,
★Ամերիկահայ մը, որ պտուղ չորցնելով չէ ծախած,
★Հայաստանցի մը, որ իր ճիւղին մէջ «մասնագիտացած» եւ «աւարտած» չ՚ ըլլայ,
★Եգիպտահայ մը, որ «ծառաներ» չէ ունեցած,
★Իրաքահայ մը, որուն խօսածը առանց իր ձեռքերու շարժումներուն հեգեւելու կարենաս հասկնալ,
★Պատարագ մը, որուն ներկայ եղողներուն թիւը եկեղեցւոյ բակը կեցողներէն շատ ըլլայ,
★Յանցանքը ընդունող բանտարկեալ մը…
★Պարահանդէս մը, ուրկէ առանց գլխու ցաւի տուն դառնաս,
★Թատերական ձեռնարկի մը թերին նշող գրութիւն մը, որ տպուելէն ետք վլվլուկ չփրցնէ…
★Երգ չգրող երգիչ մը…
★Անգործ ոճրագործ մը,
★Թերթին բաժնեգինը ժամանակին վճարող մը,
★Բաժանորդ մը որ ժամանակին թերթ կը ստանայ,
★Պապ մը, որ ազգայնամոլութենէ տարուած, իր հարազատ հայրենիքին մէջ միսի սղութենէն յառաջ եկած տագնապի մը թիկունք կենայ (հայրը մսագո՞րծ է, ինչ է… ) բայց առաջին քրիստոնեայ ազգին անապատի շիկացած աւազներուն մէջ բռնի սովամահ եղած եւ անգղներու կեր դառձած հարիւր հազարաւոր անմեղ երեխաներու տակաւին անլոյծ դատը աշխարհին յիշեցնողներուն «ոճրագործ» կոչէ։
★Թուրք դիւանագէտ մը, որ Թուրքիայէն դուրս, սանկ «քապատայի» մը քալէ…
«Փշածաղիկ», 1981, էջ. 46-47
Արշակ Խնդիրեան։
